Во планинските убавини над Битуше никна скитот на светите Кирил и Методиј

На висорамнината под планината Крчин, над долнореканското живописно село Битуше, меѓу планинските убавини, два објекта во изградба архитектонски и уметнички го привлекуваат вниманието на посетителите. Вредните раце на неимарите од Охрид, специјалисти за делкање камен и за ѕидање, кое го вршат паралелно со специјална црвена тула, во византиски стил, при нашата посета, ги нанесуваа каменот и тулите на куполите и на целата покривна површина над скитот посветен на светите Кирил и Методиј.

Пред нешто повеќе од четири години, на 31 мај 2014 година, беа осветени и поставени темелите на храмот посветен на светите рамноапостоли сесловенски првоучители и покрстители, солунските браќа Кирил и Методиј. Иницијативата за градење и идејното решение беа на архимандритот Партениј, игумен на Бигорскиот манастир, кој има голема љубов и почит кон браќата.

– Воодушевен сум од извршените градежни работи на проектираниот комплекс, кој веќе го добива свој лик, според мојата замисла и идејниот проект со препознатливата македонска архитектура на конакот и на црквата – со задоволство зборуваше архимандритот Партениј при нашата посета на скитот.
Тој ни објасни дека се гради во византиски стил, како што биле градени средновековните македонски цркви и манастири.

Според отец Партениј, есенва, пред да почнат студените и врнежливи денови, скитот ќе биде покриен со соодветен водоотпорен материјал, а на куполите ќе се постават позлатени крстови. Идната година треба да биде поставен иконостасот, а во зависност од средствата ќе започне и живописувањето.
Старата погранична караула е пренаменета во манастирски конак, а строежот на црквата е започнат од ништо.

Скитот на свети Кирил и Методиј ќе функционира како летна школа за веронаука за млади од Македонија. Изминативе неколку години во бигорскиот манастир „Св. Јован Крстител“ и во метохот „Св. Георгиј Победоносец“ во дебарското село Рајчица летните кампови по веронаука ги посетија над 7.000 деца, изучувајќи ги основите на христијанството, но и основните морални начела.

https://www.novamakedonija.com.mk/makedonija/%d0%b2%d0%be-%d0%bf%d0%bb%d0%b0%d0%bd%d0%b8%d0%bd