Основачкото собрание на огранокот на ВМРО- ДПМНЕ во Гостивар се одржа пред 33 години, на 18 август 1990 год.

По формирањето на ВМРО-ДПМНЕ на 17.06.1990 година во Скопје, започнаа активности за формирање на Општински комитет во Гостивар.

Во иницијативниот одбор, беа вклучени и лица кои учествуваа на основачкото собрание во Скопје. Првите средби се одржуваа во Ресторанот „Солун“ во Гостивар.

На почетокот бевме десетина луѓе од Зубовце и Гостивар, но за кратко време, по објавувањето на информацијата за основање на Општински комитет на партијата, секојдневно ни се придружуваа симпатизери, чиј број постојано се зголемуваше. Просторијата на вториот кат на Ресторанот „Солун“ во Гостивар беше претесна, да ги собере сите заинтересирани.

Од спротивната странана „Солун“, се наоѓаше кафеаната „Калеш Анѓа“, во која постојано имаше инспектори на СДБ, кои беа задолжени да ги следат нашите активности и да ги регистрираат лицата, кои влегуваа и ја поддржуваа нашата идеја. Како што дознавме подоцна, на некои активисти им бил вршен притисок, ги заплашувале дека ќе добијаат отказни решенија од работа, ако продолжат да доаѓаат на нашите состаноци. Но, тоа не им помогна да ги поколебаат македонските патриоти.

На формирањето на огранокот на ВМРО- ДПМНЕ во Гостивар, дојде највисокото раководство на партијата – тогашниот претседател Љупчо Георгиевски, потпретседателот Владимир Голубовски, секретарот Борис Змејковски, како и идеологот на ВМРО-ДПМНЕ Драган Богдановски и многу други. На основачкото собрание дојдоа и повеќе поддржувачи на нашата идеја од Скопје, Тетово, Кичево, Охрид и од други места.

Гостивар масовно и храбро ја прифати новата партија.

Пред да се формира огранокот, на 8 или 9 август во канцеларијата на гостиварскиот огранок, во ресторанот „Солун“, дојде Драган Богдановски, кој беше топло поздравен од иницијативниот одбор за формирање на ВМРО-ДПМНЕ во Гостивар. Притоа, Драган им даде интервју на новинарите Владо Мокров и Киро Кипроски за дневниот весник „Нова Македонија“.

По ручекот во „Солун“, заедно со Богдановски и членови на Иницијативниот одбор на гостиварскиот огранок, заминавме на митинг во Охрид. Плоштадот во Охрид беше преполн со народ, имаше околу 10.000 граѓани, кои бурно го поздравија настапот на Драган Богдановски. Во таа прилика Богдановски, меѓу другото, истакна дека единствено ВМРО-ДПМНЕ може од Македонија да создаде самостојна, независна и суверена држава.

Основачкото собрание на огранокот на ВМРО- ДПМНЕ во Гостивар се одржа на 18 август 1990 год, во големата сала на Домот на културата „АСНОМ“. За претседател го избравме Младен Србиновски, за потпретседател Делче Ицков, а за секретар Цветан Личоски.

Вечно да е ВМРО-ДПМНЕ!

Вечна да е Македонија!

Мане Јаковлески