Мартин Треневски

Овој број на мојата редовна рубрика "ЦРТИЧКИ И ОТРОВНИ СТРЕЛИЧКИ" всушност го посветувам на еден значаен настан што ќе се случи на 28ми јули (петок) во амфитеатарот на Македонската академија на науките и уметностите /МАНУ/ со очеток во 11.оо часот и воедно е покана за заинтересираните да повелат и со своето присуство да дадат почит на настанот.

Станува збор за претставување/промоција на книгата "ОД АРХИВАТА НА МАКЕДОНСКОТО ЛИТЕРАТУРНО ДРУШТВО ГРИГОР ПРЛИЧЕВ" од Сиднеј, австралиска сојузна држава Нов Јужен Велс, чиј автор е нашиот познат и плоден литературен деец Иван ТРПОВСКИ, по потекло од Охридско!

   Книгата на над шестстотини страници многу непосредно не запознава со активностите на друштвото во изминатите 45 години и е одличен приказ за творечкиот потенцијал што нашите луѓе го понеле со себе во далечна Австралија.

   Книгата пред се е наменета за запознавање на македонските научни институции, но и пошироката јавност во земјата како Македонците на тие огромни далечини (Австралија е далеку од Македонија дваесетина илјади километри) го негуваат феноменот на враќање кон корените, и тоа преку творештво на мајчиниот македонски јазик.

   И како што рекол големиот Блаже Конески "Јазикот е нашата татковина", членовите на друштвото преку своите збирки на песни, раскази, драми и други литературни сочиненија си ја негуваат својата љубов, но и носталгија кон прататковината Македонија таму, далеку зад Екваторот!

   Ние сите овде на браникот на дедовината над која се надвиснале многу темни облаци што го загрозуваат дури и опстанокот на Македонската нација, од дното на душата им се заблагодаруваме на нашите сонародници кои таму, далеку, во Австралија го негуваат својот мајчин јазик, традиции и култура и ги афирмираат во тамошната мултикултурна средина.

   Голема благодарност на МАНУ и нејзиниот претседател академик Љупчо Коцарев што ни овозможи нашата почит кон делото на Иван Трповски најискрено да ја искажеме во храмот на македонската наука и култура - МАНУ!